An Soma Fara Aikin Hajjin Bana Gadan Gadan

Yau Litinin ce ranar farko da Musulmai da ke aikin hajji suka fara aiwatar da manyan rukunan ibadar, wadda ɗaya ce daga shikashikan Musulunci, bayan da suka isa Mina da sanyin asubahi.

Mahajjatan za su kwana a Mina, kafin su kama hanya zuwa filin Arafa bayan sallar Asubahi a ranar Talata.

A ranar Laraba kuma, mahajjata za su gudanara da jifar Jamra, da yanka dabbobin hadaya, da kuma ɗawafi kafin daga baya su koma Mina inda za su kwashe kwana uku.

Mina dai wani yanki ne da ke tsakanin birnin Makkah da kuma Muzdalifa.

Sama da mutum miliyan 1.6 ne suka isa Saudiyya daga ƙasashe 160 domin gudanar da aikin hajjin na bana, kamar yadda hukumomi suka tabbatar.